In News

Aruba Excellence Foundation (A.E.F.) tin e honor di anuncia un MOU cu Educampus, e recien lansa plataforma di educacion personalisa pa menor, por medio di ‘online home schooling’.

E colaboracion a inicia na inicio di 2021 caminda cu Educampus a expresa un interes pa e studiantenan di Educampus sigui e programa di certificacion A.C.P.
Despues di varios reunion a logra concretisa con e studiantenan di Educampus lo sigui A.C.P. como un di e ‘electives’ di nan portfolio di educacion personalisa. Pa A.E.F. no tabata mucho dificil pa adapta e material pa e obhetivo aki, ja cu tin material caba cu ta wordo usa durante e A.C.P. Kids Camp ‘Turista riba mi isla’ pa e mesun grupo di edad. Ademas, tampoco tabata dificil pa adapta e material aki pa por facilita ‘online’ via Zoom, ja cu desde cu e pandemia di COVID-19 a start na Aruba, A.E.F. mesora a ahusta su programa di A.C.P. pa por ofrece esaki ‘online’ via e Plataforma Zoom.
Pa cu e MOU aki, den prome instante lo focus ariba muchanan di 8 – 12 aña. A start cu un programa piloto den Augustus cu un asercamento similar cu e A.C.P. Kids Camp ‘Turista riba mi isla’, combinando lectura di A.C.P. online hunto cu diferente field trip educativo.
En total e curso di A.C.P. tin 6 sesion online, despues di cada sesion tin un field trip. E lecturanan online ta wordo facilita pa e facilitators di A.E.F. E field trips ta wordo coordina entre e team di A.E.F. y Educampus, usando entre otro e contactonan di A.E.F. pa loke ta trata guia, presentacion y splicacion di experto durante e field trips.
Pa duna un idea di e programa, ora cu ta trata e presentacion di 360˚ virtual island tour, e siguiente siman lo combina esaki cu bishita na algun di e sitionan cu a wordo presencia den e virtual tour, y den forma di speurtocht e studiantenan lo compila mas informacion di diferente ‘landmarks’ importante na Aruba.

Durante e topico ‘Aruba su Hende y Zjeito’ lo combina esaki cu un field trip estilo ‘deep dive’ di e mesun topico en colaboracion cu Museo Archeologico.

Den e modulo di ‘Aruba su Naturalesa y Sostenebilidad’ lo haci un ‘deep dive’ di nos naturalesa en colaboracion cu Fundacion Parke Nacional Aruba.

Pa e topico di ‘Aruba su Turismo y Servicio Excelente cu Zjeito’, e studiantenan lo ricibi un rondleiding na Casa Del Mar pa entre otro experencia kiko ta come y bebe den e ‘operations’ di un hotel, haya splicacion tocante tur cos cu e hotel ta ofrece e bishitantenan den ambos ‘front of the house’ y ‘back of the house’ comprometiendo nan mes pa brinda servicio excelente cu Zjeito na nos bishitantenan.

Como culminacion di e programa, cada studiante tin cu crea un presentacion tocante con nan lo promove Aruba como un destinacion turistico na otro hoben di nan mesun edad cu ta biba den exterior.
En total ta trata di 10 sesion cu ta contene presentacion y combinacion di field trip educativo. Di e forma aki na un edad hoben e muchanan por siña e importancia di turismo pa Aruba, haya conocemento corecto y mas amplio di Aruba. Ademas, e programa ta contribui na yuda preserva nos herencia cultural, engrandese e sentimiento di orguyo pa nos isla, creando mini embahadornan cu zjeito di Aruba.

Meta ta pa cada aña escolar nobo di Educampus, e A.C.P. wordo ofreci como ‘mandatory elective’ (verplicht vak) na e studiantenan. E elective aki lo tin e number di ‘Aruba Heritage Series’.

Aruba Excellence Foundation ta gradici Fundacion Parke Nacional Aruba, Museo Archeologico di Aruba, Casa Del Mar y demas personanan cu tambe a contribui cu desaroyo di e programa aki.

Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.

Recent Posts
Get in touch

For any questions send us an email we will try to get back as soon as possible.

Not readable? Change text. captcha txt
0